Район хакимиәте тарафынан сығарылған “БР Ҡырмыҫҡалы районы муниципаль районының муниципаль телевидениеһын үҫтереү” программаһына ярашлы, районда үҙ телевидениебыҙҙы булдырыу маҡсатында “Ҡырмыҫҡалы-ТВ” телеканалы студияһы ойошторола. Лена Ткачева етәкселек иткән студияла әҙерлек эштәре алып барыла. - Әлеге ваҡытта бар документтар ҙа әҙер, эфирға сығыр өсөн лицензия ғына алырға ҡалды. Тапшырыуҙарҙы “Башинформ” йәмғиәтенең IP-телевидениеһы нигеҙендә “Звезда” телерадиокомпанияһының кабель телеканалында ҡарарға мөмкин буласаҡ. Эфир аҙнаһына өс тапҡыр сығасаҡ. Унда район яңылыҡтары, иғландар ҡаралған. Ҡотлауҙар биреп, компакт-дискыға ла яҙҙырып алырға мөмкин. Ижади төркөмөбөҙ – оператор Дамир Мөхәмәтйәнов, хәбәрселәр Ринат Шайбәков һәм Илнур Әминев – күренекле шағир, Ғ.Сәләм премияһы лауреаты Ш.Бикҡол тураһында фильм да төшөрөп өлгөрҙө. Әле үҙебеҙҙең логотипты булдырыу өҫтөндә эшләйҙәр. Улар районда барған төрлө ваҡиғаларҙы яҡтыртып, архив туплай ҙа башланы инде. Һуңғы яңылыҡтар “Бәйләнештә” социаль селтәрендә теркәлеп бара, - ти Лена Ивановна ойоштороу эштәре менән таныштырып.
Йәш коллективты байрамдары менән ҡотлап, киләсәктәре ҡыҙыҡлы һәм оҙон ғүмерле булһын, тип уңыштар теләйек.
